Zer da auzokonposta?
Norberak etxean sortzen duen hondakin organikoa, beste auzokideekin batera, gune berde batean konpost izeneko ongarria bihurtzea. Hortaz, ekimen berri honetan parte hartzen dutenek, egun kubotxo marroia kaleko bilketa puntuan utzi ordez, auzokonposta gunera eramango dute.
Bertan, kubotxo marroian bildutako hondakinak material egituratzaile edo lehorrarekin nahasi beharko dituzte sukaldeko material organiko hezea lehortzeko eta osagaietan aberasteko.
Auzokonposta guneak
Udalak bost gune atondu ditu lur publikoan auzokonposta egiteko. Gune bakoitzak 30 metro karratu inguruko azalera izango du, eta karratuak izango dira –Alde Zaharrekoa luzanga izango da–. Gune bakoitza 1,5 metroko altuerako basa-pinuz egindako itxitura du.
Hauek dira egokitu diren guneak:
Alde Zaharra (Andreone)
Altamira
Aralar
Arretxene-Txulotxo
Lopene
Bisita egutegia
Konpostatze prozesuaren martxa egokia dela ikusteko, baita auzokonposta guneen jarraipena egiteko, jarraipen bisitak egiten dira gune guztietan. Bisita horietan ere tutoretza eskaintzen zaie erabiltzaileei, alderdiren bat hobetu behar dutenek edota hasi berriek kalitatezko konposta lortzeko urratsak zeintzuk diren ikasi ahal izateko.
Izen-ematea
Materia organikoa konpostatzeko interesa duten herritarrek edota familiek Udaleko Erregistroan eman behar dute izena (eskaera erregistro bidez eginez) –Gurutze Santuaren plaza, 1–. Auzokonposta proiektuaren inguruko zalantzak telefonoz (943 521 538) edo posta elektroniko bidez (hondakinak@lezo.eus) bidera daitezke.
1. Beren jabetzako lurretan materia organikoa autokonpostatzen duten etxebizitzek (bai landa eremuko etxebizitzetan baita herri-gunekoetan ere) zabor bilketa tasaren %40ko hobaria izango dute.
2. Udalak egokitutako eremuetan auzokonposta proiektuan parte hartzen duten etxebizitzen kasuan:
- Zabor bilketa tasaren %40ko hobaria izango dute, betiere Udalak konposta kutxa hustu behar ez duenean ezta sortutako konposta bere erabilerarako prestatu ere. Parte-hartzaileek konposta erabili behar ez badute, Udalari eman ahal izango diote galbahetu eta zakuetan bildu ondoren.
- Udalari konposta kutxa hustutzeko eskatzen dioten etxebizitzek zabor tasaren % 20 hobaria izango dute.
- Konposta prozesua gaizki egin dela baieztatzen den kasuetan edota konposta kutxan materia organikoaren ekarpenik egon ez den kasuetan, betiere auzokonposta proiektuaren jarraipen txostenetan oinarrituta, etxebizitza horiei Udalak hobaria kentzea erabaki ahal izango du.