Lehenengo hitzordu arrakastatsuaren ondotik, ahalduntze eskolako bigarren saioa izango da ostegun honetan. Zehazki, Kike Amonarriz eta Izaro Arruti, Tribuaren berbak saioko aurkezleak telebistako saioan ezagutu, ikasi eta hausnartu dutenaren inguruan arituko dira 'Tribukideekin ikusi eta ikastitakoak' mahai-inguruan. Arantxa Iraola Berriako kazetariak gidatuko du solasaldia. 

Mahai-inguru honetan, Tribuaren Berbak telebista saioko 70 atal baino gehiagotan zehar ikusi eta ikasitakoen inguruan arituko dira: iraganaz, etorkizunaz, aurreiritziez, uste ustelez, datu fidagarriez eta askoz gehiagoz. 

Hizlarien hitzartzeez gain, bertaratzen direnek galdera, iruzkin eta hausnarketak egin ahal izango dituzte. Izan ere, ahalduntze eskolaren helburua herritarren parte-hartze aktiboa da, adituen esperientzia baliatzea, Lezoko euskal komunitatearen ahalduntzeko. 

Beraz, herritarrak parte hartzera gonbidatu nahi ditu Lezoko Udalak. Guztion parte hartzearekin, saio hauek Lezoko euskal hiztun komunitatea sendotzeko baliagarriak izango dira.

Ahalduntze eskolari buruzko informazio gehiago hemen aurki daiteke.