Webgune berriak diseinu modernoagoa eta intuitiboagoa du, nabigazioa sinplifikatzeari eta edukien antolaketa ikusgarriagoari esker, herritarrek bilatzen duten informazioa modu azkar eta errazean aurkitu ahal izan dezaten. Horrez gain, gailu mugikorretara egokitutako diseinua du, edozein gailutatik modu erosoan erabiltzeko.

Edukiak modu intuitiboan antolatuta aurki daitezke webgune berrian, udalaren jardueraren inguruko informazioa modu argiagoan eskaintzeko. Herritarren ikuspegitik egindako nabigazioan oinarrituta dago edukia, eta ez soilik udal antolaketaren arabera. Sei atal nagusitan banatzen da udal webguneko edukia.

• Tramiteak: udalean egin daitezken izapideak biltzen ditu (errolda, baimenak, dirulaguntzak, administrazio-prozedurak…).
• Lezon bizi: herriari dagokion eguneroko informazioa kokatzen da hemen. Agenda, albisteak, udal zerbitzuak, herriko elkarteak…
• Gobernu irekia: udalaren gardentasuna, gobernu-jarduna eta parte-hartzeari buruzko informazioa (aurrekontuak, kontratazioak…) jasotzen ditu.
• Lezo ezagutu: herriaren historia, ondarea, natura, turismo-baliabideak eta intereseko beste gaiak biltzen ditu.
• Udala: Udalaren antolaketa eta zerbitzuei buruzko informazioa eskaintzen du.
• Harremanetarako: Udalarekin harremanetan jartzeko bide guztiak jasotzen ditu, hala nola arreta-zerbitzua, kontaktu-datuak, ordutegiak eta kontsultak edo abisuak egiteko aukera.

Lezoko Udalak herritarren beharretara egokitzen jarraitzeko konpromisoa du, atari digitalen garrantziaz jabetuta, herritarrentzat administrazio digital hurbilago eta erabilgarriago bat eskaintzeko.

Bide batez, herritarrak webgune berria ezagutzera eta erabiltzera gonbidatzen ditu, udalaren informazioa eta zerbitzuak eskuratzeko tresna nagusia baita.